生茂泰：分甘和味，长作岭南之茶

生茂泰，1862年始创于广州桨栏路，原本系一间药茶行，以生产同销售甘和茶、午时茶而闻名。甘和茶曾经陪伴几代广州人争取健康生活，系广州人嘅集体回忆。1999年，由于资产重组，生茂泰合并到宝生园旗下。之后，生茂泰向饮用茶产销转型，甘和茶虽已成历史，但其推出嘅“放心茶”系列，成为“广州十大手信”之一。本次采访，记者同生茂泰嘅发展顾问麦田光先生，倾南方茶字号嘅发展历史同独特个性。

盒仔甘和茶，造就生茂泰

南都：生茂泰始创于1862年，呢个老字号初时系一个点样嘅茶行？

麦田光：讲起生茂泰，大家都知道佢以前系做药茶嘅。喺以前嘅人嘅观念里面，茶药本同源。《本草拾遗》记载话，茶系万病之药，即系话佢可以医各种各样嘅病，当然，而家嚟讲就唔系咁精确同科学。生茂泰系基于咁样一种保健医疗嘅理念而诞生，当时生茂泰嘅创始人原本系个中医，所以佢就喺中药基础上做出咗生茂泰甘和茶。

南都：甘和茶包装上写住“始创于1862年”,系先有甘和茶，定系先有生茂泰？

麦田光：生茂泰同甘和茶系一齐诞生嘅。甘和茶里面系廿八味中药，功效就系清暑消热、生津解渴、医治头痛，实际上就系凉茶。一直以嚟，甘和茶凝聚咗呢个地方嘅人嘅集体回忆，大家讲起甘和茶，就知生茂泰。

南都：生茂泰除咗做药茶，有冇兼做饮用茶？

麦田光：饮用茶系后来慢慢先做嘅，佢都有做散装茶，但系品种就唔似其他茶行咁多。其实，广州人饮茶，无非就系饮红茶、普洱茶。以前消费能力低，嗰阵时饮嘅红茶、普洱茶，都唔系而家嘅红茶同普洱。一直到1980年代初，我记得好清楚，我有个朋友去香港，系驻外官员嚟嘅。驻外官员照计条件都好好，但系佢就叫我帮佢买几斤乌龙骨（乌龙梗）。咁我就揾当时嘅劳资科长写批条，话想买5斤，佢都觉得多喇。咁你谂下，带去香港用嘅都系饮乌龙骨，可见嗰阵时啲人嘅消费能力好低，多数人都系饮红茶梗、乌龙梗。当然都有其他茶卖，十几蚊、几廿蚊一斤嗰啲，相当于而家几千蚊一斤嘅茶，但系好少。大众消费，基本都系饮茶碎、茶末、茶梗。记得嗰时迎春落厂服务，1.77蚊一斤红茶末，仲要排队买，而且每人限买两斤。

一方水土一方人，柴米油盐酱醋“茶”

南都：生茂泰做茶，主要针对大众需求，系咪决定咗生茂泰嘅品牌特色呢？

麦田光：系啊，以前做甘和茶、午时茶，呢啲都系针对普通人，广州人有啲咩燥热湿毒、头晕身兴，就会饮甘和茶，即刻茶到病除。嗰阵时主要系靠口碑相传，而家讲就好老土。但系以前冇广告，生茂泰就系靠市民嘅使用感受嚟得到认可嘅。应该讲，我哋而家虽然唔做甘和茶，但系唔好忘记我哋嘅源头，而且佢作为集体回忆，呢个品牌点嚟嘅，就更加应该唔好忘记。生茂泰起名都有缘由，“生财有道，茂德无疆，泰运亨通”,意思好吉祥，呢个都系广东特色。

南都：讲起广东特色，甘和茶系针对广东人体质，咁生茂泰作为一个岭南老字号，系咪亦都有一种特有嘅品牌文化？

麦田光：我1979年去茶厂嘅时候，生茂泰茶厂嘅厂长，系由公私合营之后嘅劳方厂长李文达担任。我喺车间做咗两年之后，就开始协助佢做厂务，一齐用一个办公室。佢做嘢好有生茂泰嗰种文化特点，亦都好有岭南人嘅性格特色，做事好低调，每日一上班，冲一壶普洱茶或者甘和茶，然后开始指挥整个厂嘅生产。佢话唔多，冇而家啲人咁浮嚣，好平和，自己喺度饮茶，但系整个厂畀佢打理得井井有条，大家都听佢嘅，有啲好似无为而治咁样。我觉得佢呢种管理方式同生茂泰嘅文化好相配，就系嗰种岭南人嘅务实、低调，讲求和谐，当时生茂泰嘅整个氛围就系咁样。生茂泰自诞生之日起，就已经同岭南城市嘅性格好吻合，佢又系喺桨栏路呢啲老广州嘅地方。

南都：一个咁低调务实嘅老字号，都经历过唔少嘅坎坷。上世纪六七十年代嘅时候，有冇受到啲咩冲击？

麦田光：1960年代“破四旧”,招牌都冇埋，肯定有啲影响。我喺厂里面做嘅时候，发现生茂泰嘅招牌一半喺桨栏路，一半喺茶厂畀人攞嚟当床板瞓。虽然当时都仲有做，但计划经济时期，所有嘢都系以国家行政意识嚟指导，带住锁链跳舞，做唔到啲乜嘢。但系佢作为一个历史品牌，始终喺广州人心目中有地位，凉茶呢啲嘢，冇理由会因为“破四旧”,广州人就唔承认佢口架。

南都：系咪因为喺广州人心目中嘅地位，同埋普罗大众对呢种茶嘅需求，令生茂泰安然度过波折？

麦田光：岭南文化包容、随和、务实、低调，系广州人集体意识嘅一种体现，亦都系生茂泰呢个品牌产生嘅土壤。有咩病，岭南人唔会话一定要去大医院睇医生，而系饮盒仔茶搞掂。呢种文化，亦都影响住后来生茂泰全面转向饮用茶后嘅经营同决策。1999年做“放心茶”嘅时候，讨论过经营同价格嘅定位。有啲品牌定位好高，走政商路线，用于送礼往来。生茂泰经过思考之后，仍然坚持原来走日常大众路线嘅定位。所谓大众路线，就系质量比较有保证，价格比较合理，呢个亦都系岭南文化嘅精神体现。话之世界点变，出门七件事，柴米油盐酱醋茶，大众日常生活系唔变嘅。所以佢依然走自己嘅路，做自己嘅事，过自己嘅日子。

行业自律与文化自觉

南都：作为生茂泰嘅招牌，甘和茶点解唔继续做？大概系几时开始专门做饮用茶？

麦田光：专门做茶，应该讲系1999年。嗰阵时供销社对宝生园同生茂泰进行资产重组，就将两个比较有生命力嘅品牌绑埋一齐。嗰阵时都仲有甘和茶，但系因为决策嘅问题，重点已经转向饮用茶。当时做咁样嘅决策系有几个原因嘅，一个系出于对市场嘅判断。茶叶市场发展到1990年代中后期，需求越嚟越大。当时嘅转型同企业发展阶段嘅规模有关，所谓鱼与熊掌不可兼得，根据自己嘅资金规模同埋整个大市场嘅发展趋势，然后做咗一个咁样嘅决定。

南都：茶叶市场喺八十年代中期之后越嚟越大，但同时开始唔规范。具体表现喺边度呢？

麦田光：改革开放之后，茶叶嘅产量同品种确实系多咗、丰富咗。特别系1980年代中期到1990年代初，广州嘅茶叶市场，我觉得喺某种意义上讲，系真正嘅繁荣。今日嘅茶叶市场，我哋讲繁荣系指需求大，销售量高。但系嗰时嘅繁荣，系指喺广州可以买到任何全国各地真真正正原产地嘅名茶。以前喺中山五路嘅茶叶公司，有得卖宋种单枞，最高系4800蚊一市斤，嗰阵时广州人均工资先几百蚊，可以讲系天价。但系，后来由于整个市场发展唔规范，有啲人觉得有利可图，就攞啲次茶嚟充靓茶，进入市场流通，咁必然对市场系一种伤害。

南都：面对而家比较混乱嘅茶叶市场，你认为需要做边啲方面嘅努力去改变呢？

麦田光：我个人觉得要三个方面，一个系制度上嘅，政府要加强指导监控，第二个就系行业自律，你自己都唔自觉，政府嘅力量都有限，边个看得你咁多？第三个就系消费者自己本身要成熟。我觉得作为有责任心嘅茶叶品牌，喺自律嘅同时，都有将茶叶嘅鉴别、饮茶嘅知识向消费者宣传嘅责任。

南都：2012年，生茂泰喺农林下路重开自己嘅专营店，系出于乜嘢考虑呢？

麦田光：其实都系出于呢个品牌系前辈交畀我哋嘅，我哋唔想佢喺我哋手上寂寂无闻。将佢做返大，对社会、对市场都有好处，至少佢系好自觉咁去规范市场，无论喺质量上定系价格上，都系合理嘅，希望慢慢形成一种规范嘅标准。

南都：除咗产品方面，对于茶文化价值嘅坚持同推广，亦都系生茂泰一直以嚟嘅责任心。

麦田光：陆羽讲，“茶之为饮，发乎神农氏”.国人饮用茶叶嘅历史，同甲骨文差唔多时间。一直以嚟，茶都系一种人追求乐生和谐嘅形式，我觉得呢个主题系永恒嘅。呢种茶文化，具体到广州呢个地方，孕育出生茂泰咁样嘅品牌。而岭南茶文化低调、务实，系一种好实际嘅身心愉悦。有句说话：为名忙，为利忙，忙里偷闲，且饮一杯茶，呢种完全系岭南茶文化嘅入世体现。我觉得生茂泰今后嘅发展，就系要将茶文化作为品牌附加值，不遗余力咁样将佢宣传出去，等更多人知道，喺浮躁嘅时候，仲有一个后花园，呢个后花园就系品茶嘅空间。呢个系老字号嘅责任感同文化自觉。文化系品牌嘅升华，你冇文化，就冇咗助跑器，冇办法走得更高。

采写：南都特约记者 冯璐赟

特别鸣谢：广州老字号协会

记者手记

郁热岭南，茶如清风拂面

好多人对生茂泰，印象最深嘅应该都系甘和茶。百几年嚟，甘和茶一直好似一个居家旅行必备嘅贴心小护士咁，守护住每一个广州人嘅健康。以前，感冒头痛都唔使睇医生，整返剂盒仔茶，即时松晒，乜事都冇。呢一个神奇嘅盒仔，里面装住廿八味中药，温润妙手拂起清风，将生茂泰呢个字号深植喺广州人心中。

生茂泰之所以系典型嘅岭南老字号，对广州人影响好深，除咗佢有专门针对岭南人体质嘅甘和茶，亦都同佢本身具有嘅岭南品性相关。麦田光先生系生茂泰嘅发展顾问，佢曾经做过生茂泰嘅厂长、经理。当佢1979年入生茂泰茶厂嘅时候，当时嘅厂长嗰种领导风格，畀佢好深刻嘅印象。每日返到办公室就冲壶普洱，然后开始指挥全厂嘅运作，话唔多，却好似无为而治咁，将成间厂打理得井井有条。麦田光认为，呢位前厂长嘅管理方式，实质上系生茂泰嘅一种企业文化，亦都系岭南文化独有嘅性格体现：低调、谦和、务实。而咁多年嚟，生茂泰一直都系“大众嘅生茂泰”,无论系以前做甘和茶，或者做散装平价饮用茶，定系而家做嘅精品放心茶，都坚持质量保证，价格合理。呢种务实，令到生茂泰喺起伏沉浮嘅历史中，仍然能够保持生命力。无论世界点样变，佢依然扎根大众，专注柴米油盐酱醋中嘅“茶”,走自己嘅路，做自己嘅事。务实得嚟，又有岭南人嘅嗰份从容。

因为有一份从容，生茂泰一直企得好淡定。喺市场规范混乱嘅时候，仍然保持质量同价格嘅稳定；1999年资产重组，大动荡中不忘根本，迸发大能量；城市变迁，门店悉数被拆，唔紧要，喺宝生园门店继续销售；面对唔成熟嘅市场同消费者，开始慢慢向外释放茶文化讯息。生茂泰嘅发展，唔单止靠行业自律稳住质量同价格，更重要嘅系，有一种传播茶知识同文化嘅自觉。

麦顾问本身博览群书，对茶经药典非常熟悉，佢认为茶文化嘅核心，就系茶本身系人要过美好、快乐、和谐生活嘅一种形式同道具，滋养人嘅身心健康。而岭南茶文化，讲求嘅更加系一种入世嘅身心愉悦。社会发展步伐越快，越需要一种调剂。茶，系可以畀人一种安静嘅感觉同埋调整身心嘅空间。

茶本身就系清润甘泽，可以带嚟从容。喺呢座郁热嘅南方城市，生茂泰做靓茶，如同一阵清风拂面，焦躁不见，润泽心田。

[街坊话事]

生茂泰，有你一身松晒

@荷花猪猪：爸爸以前一得闲就会冲茶饮，佢系帮衬生茂泰，成日都见佢冲到啲茶好浓口架，我嗰时都好奇怪咁黑嘅茶可能会好苦。嗰时我仲读紧小学，睇到电视见到香港人饮茶系落奶嘅，所以我帮爸爸加炼奶然后畀阿爸饮，佢话饮茶唔使加奶嘅，就咁饮就已经好好饮口架啦。所以我到而家对生茂泰都系好有印象。

@MA开心一族：“去边度，生茂泰。”呢句口头禅同生茂泰茶有关。细时最早识甘和茶，有咩嘢伤风感冒，老母就攞一蚊几毫叫去买几盒甘和茶焗嚟饮，当场松晒。细时未知生茂泰咁出名，后嚟听老母问去边度，老窦答生茂泰。返嚟就拎出三包嘢并讲：“早饮红茶暖胃，午饮铁观音醒胃，晚饮普洱消滞，好保健口架。”到而家仲系帮衬生茂泰。

@隽永4 6 7 22:啱啱出广州读书嗰阵，有感冒发烧，伯爷就会执包生茂泰甘和茶畀我：滚水焗嚟饮又得、落片生姜煲嚟饮又得，饮完出番身汗就成个人都松晒！咁记得呢啲往事系因为“生茂泰”个名太撬口。伯爷话，“生茂泰”即系“生财有道，茂德无疆，泰运亨通”咁解。咁有意思嘅老字号，当然望佢可以泰运亨通、长做长有啦！

@猫猫何小猫-:老窦对茶都算有研究，红茶、绿茶、黑茶、白茶佢饮一淡、闻两闻就知好定坏，退咗休最中意同班茶客一盅两件叹早茶，次次都自己带生茂泰嘅私家茶叶去茶皇厅品茶，“饮咗几十年茶，冲出嚟一睇色水就知龙与凤啦！有人饮几十万一斤普洱茶，我饮几百蚊嘅生茂泰熟普，价钱抵品质咁好，已经心满意足咯！”